“Qashqadaryo vohasi va uning Markaziy Osiyo sivilizatsiyasidagi o‘rni” ilmiy-amaliy anjumani
Osiyo texnologiyalar universitetida “Qashqadaryo vohasining Markaziy Osiyo sivilizatsiyasi ravnaqiga qo‘shgan hissasi” mavzusida ilmiy-amaliy anjuman tashkil etildi. Tadbir davomida tarixiy meros, diniy-ma’rifiy markazlar va Qashqadaryo vohasining ijtimoiy-madaniy taraqqiyotdagi o‘rni muhokama qilindi.
Osiyo texnologiyalar universitetida “Qashqadaryo vohasining Markaziy Osiyo sivilizatsiyasi ravnaqiga qo‘shgan hissasi” mavzusida ilmiy-amaliy anjuman bo‘lib o‘tdi.
Anjumanda Qashqadaryo vohasining tarixiy, diniy va ma’rifiy markaz sifatidagi ahamiyati haqida keng qamrovli ma’ruzalar tinglandi. Tadbir davomida Imom an-Nasafiy va Mahmudxo‘ja Behbudiy kabi buyuk allomalar faoliyati, Amir Temurning ma’naviy qarashlari hamda maqom san’atining tarixiy ildizlari yuzasidan ilmiy muhokamalar olib borildi.
Shuningdek, Buxoro amirligi davrida Qashqadaryo bekliklarining ijtimoiy-siyosiy jarayonlardagi o‘rni va hududning tarixiy taraqqiyotiga qo‘shgan hissasi alohida yoritildi.
Anjumanda talabalar ham faol ishtirok etib, Sulton Mirhaydar ziyoratgohi va Kasbi tumanidagi Nomozgoh masjidi kabi tarixiy obidalar bo‘yicha olib borgan ilmiy izlanishlari va tadqiqot natijalari bilan o‘rtoqlashdilar.
Tadbirning asosiy maqsadi yoshlar orasida tarixiy ongni mustahkamlash, milliy va mahalliy merosni chuqur o‘rganishga qiziqishni oshirish hamda Vatanga muhabbat va faxr tuyg‘usini shakllantirishdan iborat bo‘ldi.
Mazkur ilmiy-amaliy anjuman tarixiy merosni targ‘ib qilish, ilmiy tajriba almashish va yosh tadqiqotchilarni qo‘llab-quvvatlash uchun muhim platforma vazifasini bajardi.
